Aizawl : Agriculture minister C Lalrinsanga’n zirtawpni khan Serchhip Agriculture complex-a Bekang hriak herna khawl thar leh a dahna in thar a hawng a, loneitute hnenah hmanrua engemawzat a sem bawk.
Khawl thar hawnna inkhawmah hian Agriculture Minister chuan tel chu Mizoramin a thar theih thlai a nih avangin loneitu ten nasa zawka tel lam chi an thar a tul thu a sawi a. Sorkar pawhin hmalakna lian tak tak a kalpui reng nia sawiin, an hawn tak bakah Falkawn-ah hriak herna kawl din tura hmalak mek a nih thu a sawi bawk a ni.
Hriak herna khawl thar dahna in chu RKVY- RAAFTER 2021-22 sum Rs. nuai 20 senga sak niin, hriak herna khawl chu Rs. nuai 2 leh sing 8 man a ni a, khawl hian Bekang, Chhawhchhi, Tel Antam leh Badam te a her thei vek a, Bekang ah an insawrbing deuh dawn a ni.
Agriculture minister hian Oil palm chingtu chhungkaw za hnenah Aluminium leihlawn leh Hreité (Tomahawk) a hlan a, district chhunga thlai (vegetables) chingtu intelkhawm Farmer Interest Group panga – Leng, Hualtu, Zawlpui-Chamdur, E. Lungdar leh Thenzawl te hnenah Multi Purpose Crates (Plastic basket) 20 theuh a hlan bawk.
Serchhip district-ah hian Oil Palm hi khaw 12 ah chin mek niin, chhungkua 334 in a huan an nei a, kung 47762 an enkawl mek. Mi pakhatin kung 150 enkawl ang zela chhut niin, ram 386 Ha. a zauah an ching a ni. Serchhip district atanga Oil palm hralh tawh zawng zawng qtls 4777 a ni a, chhungkaw 53 chauhvin an la hralh thei rih a ni.