Aizawl : Mamit Bawrhsap Pisa-in nimin khan Silver Jubilee an lawm a. Mamit Bawrhsap hlui Nghaklianmawia’n khuallian niin he hun hi a hmanpui.
Nghaklianmawia chuan Mamit Bawrh- sap a nih laiin district “dangin an tih theih chuan kan ti ve thei tur a ni” tih rilru pua hna an thawh thin thu a sawi a. Bawrhsap leh a thawhpuite pawhin he- tiang rilru, neitu rilru puin hna an thawka a hriat thu leh lawmawm a tih thu sawiin, an chhunzawm zel a beisei thu a sawi a, duhsakna a hlan bawk.
Mamit district chu aspirational district a nih angin district hmasawnna tura thawktute pawh a tha hlang awmkhawm nia sawiin, Nghaklianmawia chuan district hmasawnna tura theihtawp chhuaha hna thawk turin a chah a. Mamit khua chu lawm nachang hria leh hmasawnna ngaina tak khua nia a hmuh thu sawiin, tanrualna leh inlungrualna nen tha taka thawkho zel turin kalkhawmte chu a chah bawk a ni.
Mamit Bawrhsap hlui dang Vanlalngaihsaka pawhin Mamit Bawrhsap Pisa Silver Jubilee lawmna-a a tel thei avanga lawmawm a tih thu sawiin, Mamit Bawrhsap tum 2 leh SDO (S) a lo nih tawhnate avangin Mamit-ah a mikhual loh thu a sawi a. District hmasawnna tura tha taka hnathawk zel turin duhsakna a hlan.
Mamit Bawrhsap Pisaa Circle Assistant – I (Rtd) H. Lalchamliana’n Mamit-in District headquarter a hmuh dan chanchin chipchiar takin a sawi a. President, Sub Hqrs. YMA, Mamit Vanlalchhuanga Chhangte leh midang ten thu an sawi bawk.
Sorkar thuchhuahin a tarlan danin, Mamit district hian kum 25 chhungin Bawrhsap 17 nei tawhin, kum 1998 April ni 24-ah Bawrhsap hmasaber Z. Lalhmingliana hovin Bawrhsap Pisa chu an luah tan a ni.