May 9, 2023-a Chakma Autonomous District Council (CADC) inthlan lo awm tura chuh tumten nimin khan hming an an pe lut.
State Election Commission chuan April 17 khan CADC inthlan hun tur hi a puang a, nimin tlai dar 3 thleng khan he inthlan chuh tumte tana hming pek luh theihna hun a hawng.
CADC inthlan chuh tuma hming pek luhte hi vawiinah endik a ni ang a, inhnukdawk leh duh tan April 27, 2023 chhun dar 12 thleng hun hawn a ni ang. May 9, 2023-ah mipuiten vote an thlak ang a, vote thlak that ngai a awm a nih chuan May 10, 2023-ah vote thlak that tur niin vote tlate chu May 11, 2023-ah Chawngte-ah chhiar a ni dawn a, May 12, 2023-ah chuan inthlan kaihhnawih pawimawhte zo fel tawh tura ruahman a ni.
He inthlanah hian BJP, INC leh MNF chuan bial awm zawng zawng, bial 20 an chuh vek dawn a, ZPM party-in nimin khan candidate puan belh lehin a vaiin bial 13 an chuh thung ang.
Nimin vek khan Lawngtlai District Election Officer, Lawngtlai Bawrhsap David Lalthantluanga hovin election official-te, LADC, CADC leh state sorkar department hrang hrang official-te leh mobile service provider-ten CADC inthlan atana inbuatsaihnate thlirhovin hmalak zel dan tur te an sawiho bawk a ni.