Aizawl: BJP, Mizoram state President Vanlalhmuaka’n nakuma MP inthlan lo awm turah Mizoramin BJP MP a nei a nih chuan union minister nihna kawng zau takin a inhawng dawn niin a sawi.
Nimina BJP state office-a kar thar inhlanna leh political session-ah he thu hi BJP, Mizoram state president chuan a sawi a. Kum 2024 MP inthlan chu Mizoram tan mellung pawimawh a ni thei dawn niin a sawi.
Vanlalhmuaka chuan Mizoramah BJP-in hma an sawn nasa nia sawiin, kumin kumtawpa MLA inthlan lo awm tur chu BJP-in Mizorama hmasawnna lungphum an phumna hun tur leh Mizoram atanga retheihna umbo bultanna tur a ni dawn niin a sawi a. “Politics avanga Mizoram mipui buma awm mekten development chanchintha hi an hriat zel theih nan tan kan lak a ngai a ni,” a ti.
Mizoramah politics harhna a thleng mek nia sawiin Kristianna chungchanga BJP-in beih an tawh thinte pawh politics-a inbeihna a ni tih miin an hre tawh niin a sawi a. Mizoram damna turin Pathianin BJP chu hmanruaah a hmang dawn nia sawiin, “Pathian hmanrua dodal thinte chu an te tawlh tawlh zel a ni,” Vanlalhmuaka chuan a ti bawk.