Aizawl: Congress party chuan April thla a tawp dawn thleng pawha Mizoram sorkar hnathawk tam takin hlawh an la thei lo chu finance enkawltu, Chief Minister Zoramthanga hlawhchhamzia a tar lang chiang hle an ngaih thu thuchhuah an siam.
MPCC chuan tual chhung chanchinbu pakhata sorkar hnathawkte hlawh lak tlai chhan finance department insawifiahna, ‘IFMIS hman thiam loh vanga ni’ tih hi department hrang hranga hlawh siamtute an kawmnaah a dik lo tih a lang thu an sawi a. “India rama sorkar sum enkawl dan thar, Integrated Financial Management and Information System (IFMIS) hian harsatna tam tak a thlen ngei a. Amaherawhchu, he harsatna hi department hrang hrangte thiam loh ni lovin, IFMIS system-ah fel lo tam tak a awm vang zawk a ni,” an ti.
“Kum hnih kalta atanga he system hi hman tura tih a nih rualin, vawiin thlengin system-ah fel lo a la tam a, portal a luh theih loh te, approve theih mai loh te, luh hleih theih loh chang te, bawhzui fe pawha approve mai theih lohte a tam em em a ni,” tiin, hei hi sorkar thiam loh dik tak niin, a bikin Finance Minister Zoramthanga’n mawh a phur lian ber niin an sawi.
MPCC chuan Congress hun lai khan sorkar hnathawk nghette hlawh lak theih loh a awm ngai lo a, sorkar hnathawkten a hun taka hlawh an lak mai bakah GP fund leh bill hrang hrang hun rei tak tihkhawtlai a awm ngai lo nia sawiin, “MNF sorkar hnuaia hetiang taka finance management-a buaina a thleng chho ta hi MNF sorkar leh finance minister, CM ni bawk, Pu Zoramthanga hlawhchhamzia a tar lang chiang hle a ni,” an ti.