Aizawl: ZPM party President Lalliansawta’n tun hnaia bial hrang hrang vil bik tur an ruat mi 35-te chu candidate an ni ngei tihna a la nih loh thu leh a tul dan anga la insiam rem zel tur a nih thu a sawi a. Vawi eng emawt zat nomination committee an thut tawh thu leh harsatna leh inlungrual lohna liantham an la neih loh thu a sawi.
ZPM President Lallalliansawta’n an tanrualnain tun hnaia LMC inthlan leh local council bye-election-ah te rah tha a chhuah nia sawiin, lawmawm a tih thu a sawi.
ZPM president chuan tun hnaia inthlana hnehna an channaah an leader, Lalduhoma leh an Working President K Sapanga te thawhrimna chhuanawm a tih thu a sawi a. An MLA leh AMC lama an corporator te, party-a chanvo hrang hrang neite leh party mipuite thawhhona a thain an tangrual tha hle niin a sawi.
MLA seat 40 a awm thu leh chan vek theih a nih loh thu ZPM president chuan sawiin, chhungkaw buaina a thlen lohna tura inveng turin an party mipui a chah a. An elpui party-te game-a lut lo tura inveng turin a chah bawk.
ZPM president chuan nomination chungchangah huaisen tura fuihtu an tam thu sawiin, huaisen taka an kal thu pawh a sawi a. Lungawi lohna nei an awm a nih pawhin social media lama an lungawih lohna tilang mai lova nomination committee-in ruahmanna a siam chu pawm turin a chah bawk.