Sunrisers Hyderabad in hnehna an chang mai dawn a ang hman thin viau a, mahse Delhi Capitals an tang thei zel a, a tawpah vannei zawkah tang in run sarih in an chak a. Tun season-ah a vawi hnihna atan Indian Premier League-ah hnehna an chang.
Rajiv Gandhi International Stadium-ah Hyderabad an che chhe lo. An bowler Washington Sundar chuan Delhi in an vuak laiin wicket thum a la a, Capitals buai teuh mahse an ding tlang hram.
Ani mai bakah Bhuvneshwar Kumar chuan wicket hnih a lak bakah over li chhungin run 11 chauh a pe a, Delhi batsman te hrektu a ni.
A vuak lamah Mayank Agarwal chuan Sunrisers tan ball 39 atangin run 49 a siam a, bul tan thatpui mahse Delhi in hnehna an channa tura an mamawh ang an ti thei zel.
Over hnuhnung berah chak turin run 13 an mamawh a, Washington Sundar leh Marco Jansen ten Sunrisers chakpui thei an ni. Mahse Delhi bowler Mukesh Kumar a chiai lo. Yorker dik taka vawm fovin run nga chiah a pe a, Delhi an chak.
Capitals spinner Axar Patel leh Kuldeep Yadav ten an pahnih belhkhawmin wicket thum an lak bakah run 43 chiah an pe a. Vaw hmasa Delhi tan Manish Pandey leh Patel ten run 34 ve ve siamin mimal a che tha langsar nei lo mahse an tanrual leh a hun taka an chet fuh thin an chakpui.