Atalanta in tun Serie A season kal laiah a sang pali zinga tel tura beiseina an la nei a. AS Roma lakah hnehna pawimawh tak mai changin 3-1 in an mikhual an lo hneh.
Thawhtanni zanah Stadio Atleti Azzurri d’Italia-ah Atalanta hian Roma hi an mikhual a. Mario Pasalic, captain Rafael Toloi leh Teun Koopmeiners ten goal khungin a zawna match thum chak tawh Roma kaltluang lai an titawp.
Gian Piero Gasperini pawlte hi table-ah pasarihnaah an awm mek a, chutihrualin palina a awm AC Milan leh an hneh tak Roma te aia point li chauh a an hniam zawk avangin an tan beisei tur a la awm.
Halftime hma deuh a Duvan Zapata cross atanga Pasalic-a’n goal mawi a khung hnuah inkhel a nung a. Atalanta in captain Toloi hmanga an khung belh hnuah Lorenzo Pellegrini chuan Roma tan goal khat khung mahse a khung hnu lawkah Koopmeiners-a’n a khung ve leh a ni.
Coach Gasperini chuan, “Team tha tak, chesual duh ngai mang lo leh inthlahdul lai nei khat tak kan hmachhawn a, kan inkhelah goal nawr kawngah kan hriam a, ball kan chan a tihsual kan neih tlem avangin kan chak. Kan inkhel pumpui a tha. Thildang pawh tha tak taka tih kan nei, chutihrualin hmasawnna tur pawh a la tam.” tiin a thlirlet.