Haiti khawpuia cheng mipui thinrim chuan mi sual pawla tel nia hriat mi 13, police an man lai leh an lirthei an zawnsak lai chu sawisain an hal hlum.
He thil hi Thawhtannia Port-au-Prince-a thleng kha niin mipui hian lirthei kea gasoline thun hmanga nasa taka an sawisak hnuah an hal zui ta a ni.
Police chuan tihhlum takte kut atang hian a hma lawkin ralthuam an man tih an sawi.
An kuta an awm laia mipuiin an chhuhsak leh an sawisak zui dan tak erawh an sawi lo.
Haiti ram hi July, 2021-a President Jovenel Moïse thah a nih hnuah dan mumal a awm lovin pawikhawihna a tam hle.
United Nations chuan Thawhtannia report a tihchhuahah chuan an khawpui ber hi an indo hun laia a him loh ang tluk zetin a him lo niin a tar lang.
Ralthuam keng mi sual pawlten an ram zauh tumin hma an la a, police leh an elpui pawl dang nen inbeiin ‘tharum thawhna a nasa tak zet a, civil mi tam takin an tuar’ nia tar lan a ni.
UN-in a chhinchhiah dan chuan April 14 leh 19 inkarah pawh khan mi sual pawl chetna avangin mi 70 dawn an thi a, an zinga 18 chu hmeichhia niin naupang pahnih an tel bawk.
Sikul leh damdawi in tam tak khar a ngai a, tharum thawhna nasa avangin bungrua leh mamawh dang inpek kualna a buai vek bawk.
“Haiti hi khawvela mihring dikna chanvo palzutna nasatna ber ram zingah a tel a, puih an ngai tak zet,” tiin report-ah hian tar lan a ni.
Moïse-a thah a nih hnuah khan Caribbean ram hi Prime Minister Ariel Henry-a’n kaihruai zuiin mi sual pawlin an khawpui 60% vel an thunun chu a chhuhsak thei rih lo.
Henry leh UN thuneitute chuan police pui tur hian ram dang mite lut se an duh thu an sawi fo tawh.
Tun thleng erawh chuan eng ram mahin puih an inhuam thu an la sawi lo va. United States chuan Canada chu sipai tir lut turin thlem mah se Prime Minister Justin Trudeau-an a hnar thung.
Henry-a chuan rei tak inthlan tihkhawtlai tawh pawh an ram a him phawt loh chuan tihngaihna a awm lo niin a sawi.