Karnataka assembly inthlan tur chu mi 2,613-in an chuh dawn ta.
May 10-a vote thlak tura chuh tum hming pete inhnuhdawh theih hun chu Thawhtanni khan a tawp ta a ni.
Chuh tura hming pe zinga mi 517 chu an inhnukdawk leh a, party hrang hrangah candidate chang lo lungawi lohna a thleng mek.
Candidate 2,613 zinga 2,427 zet chu mipa niin hmeichhia 184 leh a dang pahnih an ni tih Chief Electoral Officer, Karnataka chuan a sawi.
BJP atangin chuhtu mi 224, Sarvodaya Karnataka Party-in an thlawp Congress-in 223, JD(S)-in 207, AAP-in 209, BSP-in 133, CPI(M)-in pali, JD(U)-in pariat leh NPP-in pahnih an nei bawk.
Chuhtu zinga 685 chu Registered Unrecognised Political Party (RUPP) an tih zinga mi niin mi 918-in independent-in an chuh dawn bawk.
Bial 16-ah chuhtu mi 15 aia tam an awm a, Ballot Unit (BU) pahnih hman a ngai hial dawn.
Assembly member 224 thut theihna inthlan hi May 10-a neih tur niin May 13-ah vote tlate chhiar zui a ni ang.