Local Administration Department Minister K. Lalrinliana’n nimin khan National Panchayat Awards 2023 ‘Nanaji Deshmukh Sarvottam Panchayat Satat Vikas Puraskar (NDSPSVP)’ lawmman pakhatna dawngtu, Ngopa VC te, press mi leh LAD hotute a pisa-a lengah a sawm a. India rama panchayat 2,55,000 chuang zinga NDSPSVP category-ah lawmman pakhatna dawngtu Ngopa VC chu Mizoram tihmingthatu an nih avanga chhuanawm a tih thu a hrilh.
LAD minister chuan Ngopa VC lawmman dawnin a ken tel, Rs. nuai 150 chu central sorkar duh dana Ngopa khaw hmasawnna hnathawhna atana hmang ngei turin Ngopa VC te chu a chah bawk.
Ngopa VCP K Lalremsiama pawhin lawmthu sawiin an lawmman dawn chu khawtlang leh an khuaa sorkar hnathawkte tanrualna leh thawhrimna rah a nih thu a sawi a. Mizoramah an khua aia ti tha thei tur khaw tam tak an awm nia a hriat thu sawiin, khaw dangte pawhin hma an sawn zelna tur leh Mizoramin hma a sawn zelna tura India ram huapa hming lam tham tura theihtawp chhuah tura a duh thu a sawi bawk.
Tar lan tawh angin April 17 khan Ngopa VC hnenah hian President Droupadi Murmu-i’n New Delhi-ah NDSPSVP lawmman pakhatna hi a hlan a ni.
Ngopa VC lawmman dawn, ‘Nanaji Deshmukh Sarvottam Panchayat Satat Vikas Puraskar’ hi sustainable development goals 17-te tihthlawhtlinna tura localization of sustainable development goals theme (thupui) hrang hrang pakuaa a pum puia titha lawmman a ni a. Localization of Sustainable Development Goals (LSDGs) theme 9-te chu – Poverty Free & Enhanced Livelihood, Healthy Panchayat, Child Friendly Panchayat, Water Sufficient Panchayat, Clean & Green Panchayat, Self Sufficient Infrastructure, Socially Secured Panchayat, Panchayat with Good Governance leh Women Friendly Panchayat te an ni.