Aizawl : Lunglei District Congress Committee (LDCC) Vice President R Lalnunthara chuan Zoram mipuite heti tak maia an beidawng tan hi Mizorama political party tinte an inenfiah a ngai tih a sawi.
Thawhtanni khan LDCC chuan an party pisa-ah political session an nei a. He huna thu sawitu R Lalnunthara chuan, “Kan sorkar laiin mi hnuaihnung zawk leh chanhaite kan lo khaichhuak tawhin thil tha tam tak kan ti a, chutiang bawkin MNF sorkar pawhin mirethei te khaichhuah hna thawkin thil tha tam tak an ti a, heti chunga mipui an beidawng em em hi party dangte leh keini Congress party ngei pawh hi kan inenfiah a, Lalpa hi kan lamah a tang talo em ni tih in enfiah ang u,” a ti.
Tun lai huna politics khelh da, sorkar hrawn lai khalh ngil tum piah lama dawt hmanga inpuh vak vak leh party dangte chhiatna ringawt sawi hi thangtharte hian an kham tawh nia sawiin, “Party politics tuinu hi a fim a kan thlak a ngai tawh,” tiin a sawi.
R Lalnunthara chuan Congress party ngei pawh party politics tuifimah inchiahin chumi atang chuan ram rawngbawl hna thawk tura inbuatsaih a, party hruaitu chin chuan dawt leh thu puarpawleng buaipui lovin thu tak hmangin politics khelh a tul tih a sawi a. Congress party hian Zoram hi eng tia hruai nge an tum a, eng nge thlen pui an tum tih an inngaihtuah harh a hun tawh tih a sawi bawk.
He hunah hian Joseph Lalhimpuia Ex MLA pawhin thu a sawi a ni.