West Phaileng khuaah Congress party-in an party-ah mi thar lawm luh inkhawm nimin khan an nei. He huna thusawitu Congress Legislature Party leader Zodintluanga Ralte chuan Mizorama ram tana ro tling hmasawnna thlentu chu Congress party an nih thu a sawi.
Mizoram tana hmasawnna ruhrel lian tak tak MNF sorkarin a lo sawpchhiat vek tawh Tuirial Hydel Project leh Falkawn Referral Hospital te chu Congress sorkar kalta chhunga tih puitlin a nih thu sawiin Zodintluanga Ralte hian, “Falkawn damdawi in doctor zir theihna tura hma latu chu kan vice president Pu Lal Thanzara a ni, tunhnai lawkah pawh kan tualchhungah ngei Mizo nula tlangval za dawnin doctor an zir zo thei a ni,” a ti.
Tum neia hma la a, sorkarna a chelh apianga mirethei khaichhuahna programme nei thin chu Congress party an ni tiin Zodintluanga Ralte chuan, “Kan ram dinhmun a chhe em em a, ram siam tha tura Congress party a sorkar leh a tul hle a ni,” a ti bawk.
Thusawitu dang John Rotluangliana chuan kum 2023 inthlanah an president mi hmingtha leh sum enkawl thiam Lalsawta hova an sorkar ngei tur thu a sawi a. “Kalphung nei mumal party chu Congress kan ni a, party pakhat kalphung pawh la nei ngai lovin kalphung thar an zuar hi thil inhmeh lo tak a ni,” tia sawiin, Congress party chu tawnhriat nei, kalphung thara kal thei zawk an nih thu a sawi.
West Phailenga lawmluhna inkhawmah hian MPCC GS C Lalhlimpuia leh Dampa East block president Lalrinpuia ten thu an sawi bawk.