Pakistan hmarthlang lama counter-terrorism office-a thil puakah mi 12 vel an thi tih thuneituten an sawi.
Police chuan he thil hi miin an beihna avanga thleng a ni tih fiahna a awm lo tih an sawi a, electric kal sual avanga thleng pawh a ni thei tih an sawi.
Thi zinga a tam zawk hi police officer an ni.
Thil puak hi Swat valley-a thleng niin heng lai hmun hi Islamist hel pawlin an thunun reng thin niin kum 2009 khan um darh an ni chauh.
Mi 40 chuang hliam tuar awmin in eng emaw zat a chim bawk.
Afghanistan nena an inrina, Khyber Pakhtunkhwa province police thupuangtu chuan puak thei eng emaw kangmeiin a man niin a sawi a, hetiang hi chu ‘electric short-circuit’ vang a ni duh hle tih a sawi.
“Tun thleng chuan pawn lam mi beihna vang a ni tih fiahna tur a la awm lo,” a ti.
Tun hnaiah Pakistani Taliban chuan venhim hna thawktute an bei nasa hle thin a; mahse, tun tuma thil thleng hi chu an tihah an la chhal lo.
Counter-terrorism department-a regional chief Sohail Khalid pawhin thil puak chu firfiaka chetna a an loh thu Reuters a hrilh bawk.
“Puak thei chi hrang hrang tam tham tak dah khawmna hmun a ni a, fimkhur lohna thil avanga puak palh ta a nih kan ring ber,” a ti a. “Kil hrang hrang atangin a chhan ni thei dap mek a ni,” a ti.
Prime Minister Shehbaz Sharif chuan a tirah ‘thihchilha beihna’ tiin a sawi zet a; mahse, a hnuah ‘a chhan chhui mek a ni’ tiin Twitter-ah a tar lang leh thung.
Heng lai phaikuam hi hel tamna hmun a nih avangin Pakistani counter-terrorist sipaite pawh an inbun nasa hle.
Kum 2012 khan heng lai hmunah hian Nobel Laureate Malala Yousafzai pawh kah a lo ni tawh.