Aizawl : Sorkar hmalakna hnuaia ruihhlo do beihpui thlakna tur chu thawhtanni khan Excise Minister Er Lalrinawma’n a hawng.
Assembly Annex Conference Hall-a ruihhlo do beihpui thlakna tur khuhhawnah neihah thu sawiin Er Lalrinawma chuan ruihhlo leh a kaihhnawih harsatna hian Mizoram a run nasa tih a sawi a. Ruihhlo hman sual leh dan lova tawlhruk hian mi mal leh khawtlang nun a ti chhiain, hmasawnna kawng hrang hang a tihthuanawp a, pawikhawihna leh dan bawhchhiatna a thlen nasat thu a sawi.
May 2022 khan ruihhlo do beihpui thlak turin chief minister hmalaknain ‘Core Committee on Ruihhlo Do’ neih a lo ni tawh a. Core Committee-in a rel angin Social Welfare Minister chairman-na hnuaiah working committee din a ni a, ruihlo dona kawngah chak zawk a hmalak anih theih nan supply reduction, demand reduction leh harm reduction turin hma an la a ni.
Working committee ruahman angin district tinah Bawrhsap kaihhruainain Task Force din a ni a, anni hian district leh village level-ah ruihhlo dona kawngah hma chak takin an la dawn a. Ruihhlo dona atan hman turin NGO, department leh district hrang hrang Deputy Commissioner te hnenah Rs 3,00,00,000 sem nghal a ni.
Ruihhlo Do Core Committee Vice Chairman R Lalngheta, President, Central YMA kaihhruai inkhawmah hian Ruihhlo Do Core Committee Secretary Prof. Lalnuntluanga, Lalbiakthanga Khiangte, IPS, IGP(Law & Order), Mizoram Police-te’n thu an sawi bawk.
He hunah hian district hrang hrang DC leh SP, Mizoram Police, Excise & Narcotics Dept. Food & Drugs Administration, MSACS, CYMA, CYLA, MTP aiawh te an tel a ni.