Aizawl: I&PR Minister Lalruatkima’n, “Kan tawng aia hnam dang tawng kan hman nasat zawk chuan kan hnam a boral ngei ang,” a ti a. Tawng a ral chuan hnam a ral thin thu a sawi.
Nimina MZP-in World Book Day an hmannaah he thu hi I&PR minister chuan a sawi a. Ziak miten lehkhabu an ziahte hlut thar a tul thu sawiin, “Ziaktu kan nih theih loh pawhin chhiartu nih tum ila, tawng a ral chuan hnam a ral thin tih hriaa Mizo tawng ziah dan dika ziah uar zelin leh thu ril leh thu belhchiandawl leh thu dik awmna chu lehkhabu tha a ni tih hre thar lehin, Zoram hi Zohnahthlakte chenna tur, ram chhenfakawm a nih zel nan lehkhabu chhiar uar kawngah tan ila thar ang u,” a ti.
Hnam fing leh mi fing apiangin lehkhabu hlutzia an hria tih Lalruatkima chuan sawiin, thiamna thehdarh nan lehkhabu chu a pawimawh a ni tih an hre zual zel thin niin a sawi a. Mizo tawng humhim leh tihhmasawn piah lamah Zo hnahthlak hnam hrang hrang tawng tihhmasawn nan lehkhabu chu hmanraw pawimawh tak a nih thu a sawi.
Kumina World Book Day thupui, ‘Indeginous language’-in a tum chu tualchhuak tawng humhalh leh tihhmasawn a nih thu sawiin, “Khawvelah hian tawng tam tak a ral a, a hmangtu an tlem avangtein emaw, a hmangtute thuziak lama an chak tawk loh avang te emaw a nih theih thu a sawi bawk.
I&PR minister chuan World Book Day chu World Book & Copyright Day emaw, International Day of The Book ti pawha sawi a nih thu sawiin UNESCO-in kum 1995-ah April 23 chu World Book Day atan a puan thu a sawi a. Kuminah Mizoramah chuan he ni hi Pathianni a nih avangin nimin khan hman a ni.
World Book Day hmannaah hian MAL Book of the Year, 2022 dawngtu, Dr. Zohmangaihi hnenah lawmpuina hlan a ni a. Ziaktu, C. Lalnunchanga biangbiakna hun hman a ni bawk.