Chelsea interim manager Frank Lampard chuan an right-back Reece James chu tun season atan a inkhel tawh dawn lo tih a sawi chiang a. Midfielder Mason Mount pawh khelh hmabak pasarih an la neihah hian a chhawr theih a beisei tawh loh thu a sawi.
James hi tihrawl hliam a nei tih hmuhchhuah a ni a, Mount hliam hi sawichian erawh a ni lo.
Lampard chuan, “Reece James hi tun season chhung chu a inkhel tawh dawn lo. Mount pawh hi hemi hun chhung vel tho hi a chawl ang.”
“Reece hi kar hmasa kan inkhelh khan tihrawl hliam a nei a, inkhel tluan thei mahse a hliam enfiah a nih hnuah a chawlh a ngai.”
“Mason hi a hliam hian hun engemaw chen atang khan a tibuai tawh a. Team ka enkawl hma atanga awm tawh niin a tih fo thin angin inkhel thei turin theihtawp a chhuah. Mahse zai a ngai dawn a, chuvangin kar li tal a inenkawl dam a ngai dawn.”
“Kan match hnuhnung ber hi a khel thei mai thei a, mahse hei pawh hi kan beisei chiah lo.” tiin a sawi.
Blues hi Premier League-ah 11-na an ni mek a, kar hmasa khan Real Madrid lakah UEFA Champions League quarter-final atangin an tla a. Season thar a European football khel pha turin beiseina an tan a ral tawh ang a ni a. Hei vang hian an tan a tha thei ang bera season khar bak tinzawn tur a awm tawh lo.
Hetihlai hian coach thar tur chungchangah thawm thar a awm a. Chu chu Mauricio Pochettino niin Tottenham Hotspur manager hlui hi inbiakna thui zawk an neihpui tawh.
Paris Saint-Germain a enkawl hnua hna dang la chelh leh lo Argentine coach hian Stamford Bridge pan hi a club hlui lama kir aiin a duh zawk a, mahse inremna a awm hma in indawrna hi hun engemaw chen a la kal tura ngaih a ni.
Chelsea in lakluh fel thuai an duh thung a, kum 51 mi Pochettino hnuaiah hian kal dan tur neih fel vat an duh.
Tun thla tira Chelsea in coach Graham Potter an ban hnuah interim manager Frank Lampard hnuaiah inkhel vawi li an hmachhawn tawh a, an la tlawm vek.
Pochettino hian season tawpah nge an club nen inrem veleh a team thar hi a enkawl nghal tur hriat a la ni lo bawk.