Aizawl : ZPM in kumin MLA inthlanpui lo awm turah mipui a duh apiangin campaign atana sum hman tur thawh theihna tur ZPM Fund Raising Campaign khuhhawnna an nei.
Music Home, Zomuan venga ZPM Fund Raising Committee bul tuma ZPM Fund Raising Campaign hi ZPM Working President K Sapdanga’n a khuh hawng a. Thu sawiin, “ZPM Party Campaign Committee chuan Zoram hmun hrang hranga mipuite inhawnna te, India ram leh ram danga Zo hnahthlak awm te thlenga inhuamna te a lo hria a, party unit leh block hrang hrang te’n sum tuaka an hnatlang te a hmuhin; hun remchang campaign fund thawh theihna siam thain a hria a, he programme hi a lo buatsaih ta a ni,” tiin he hun buatsaih a nih chhan a sawifiah.
K Sapdanga hian mipuite’n, a bikin thangtharte’n an beisei sorkar tha leh rintlak, corruption do ngam tur, mipuite hmai eng zah nachang hria sorkar a neih theih ngei nan, a tam lam chu eng zat pawh ni se, tlem lua awm lo vin, an remchan ang zat apiang thawh a mipui sorkar tuak chhuahpui turin mi tinte a sawm tih sawiin, “ZPM party hi mawhphur tura min siam phawt chuan sorkar tha, sokar thianghlim mipui sorkar pek let ngei kan tiam nghal bawk e,” a ti.
Thusawitu dang ZPM Consultant W Chhuanawma chuan pawl reng reng hi sum tel lovin tumah an kal thei lo a. A bik takin political party te phei chuan sum kan mamawhna a nasa em em vek a ni, a ti a. Sum dawngtu chu a petu thuhnuaia kun a nih avangin ZPM hian an zalenna hralh ve tur khawpin sum hi an mamawh loh thu sawiin, “He party hian sum mamawhna avangin tu thuhnuaiah emaw a kun a lo tul a nih pawhin Mizo mipuite kuta tluk luh hi kan duh ber a ni. He ram hi a na a nih chuan ZPM hi a na a ni,” a ti bawk.
Campaign Kick-off hun hman chhung hian kalphung thar thawhlawm bawm hun nghal niin, hmun hrang hranga mi inphalte thawhkhawm Rs 9,35,077 a tlingkhawm hman niin ZPM thuchhuah chuan a tar lang.