United Nations chuan kumin kum chanve liam ta chhungin Afghan civil mi thi leh hliam chu an pung a, a tam ber tum a nih thu a sawi.
Report tharah chuan kuminah hian Afghanistan-ah civil mi 1,600 chuang an thi tawh a, nikum aiin 47% zetin an tam tawh.
UN hian kuminah hian thi hi an pun zel an la ring bawk.
Afghan sorkar sipaite hi an ram zau tak awp tawhtu, Taliban hel pawl nen an inbei nasa hle.
Kum 20 dawn hnuah an rama ram dang sipai awmte chu an inthiar chhuak mek zel bawk.
UN-in kum 2009-a a chhinchhiah tan chinah kumin May leh June kha thla khata thi an tam ber tum a ni.
UN report-a tar lan a nih dan chuan civil mi thi 64% chu sorkar do pawlte chetna vang a ni a. Sorkar lamtangte chetna avanga thi chu 25% niin 11% chu indonaa thi hrim hrim an ni a. Thi zinga 32% chu naupang an ni bawk.
Sorkar leh Taliban-ten remna zawnga inbiakna chu a kal muang hle a. Afghanistan-a UN palai, Deborah Lyons chuan lehlam lehlam hi buaina chhuak leh thihna thleng nasa lutuk titawp thuai turin a nawr.
“Report atang hian Afghan mite dinhmun leh uiawm tak takah kumina an liam tamzia a lang a, he tharum thawhna hi a tawp lo a nih chuan a pung zel dawn bawk,” tiin UN-in thuchhuah an siamah a sawi.