Aizawl: May 9, 2023-a Chakma Autonomous District Council (CADC) hnuaia Member of District Council (MDC) inthlanpui lo awm tura chuh tuma hming pek luhte endik an ni a, hming pe lut zinga pahnih chu standby an ni.
CADC inthlan lo awm tura chuh tum hming pek luh theih hun tawp April 24, 2023 (Thawhtanni) tlai dar 3 thleng khan constituency 20-ah hming pe lut mi 76 an awm a. Heng hming pek luhte hi Thawhlehni tlai dar 3 atang khan Returning Officer David Lalthantluanga hovin Chawngte SDO (Civil) office-ah endik a ni.
Bial 20-a inthlan chuh tuma hming pe lut mi 76 zingah mi pahnih chu standby niin, INC atangin 18-Fultuli leh 16-Damdep bialah hming an pe lut a. Heng mi pahnihte nomination tih loh, mi 74-te nomination chu pawm vek a ni.
Chuh tuma hming pe lutte tan hian vawiin chhun dar 12 thleng inhnuhdawhna hun hawn a ni.
11th CADC inthlanpuiah hian political party pathum – Bharatiya Janata Party (BJP), Indian National Congress (INC) leh Mizo National Front (MNF) te chuan bial awm zawng zawng an chuh vek a. Zoram People’s Movement (ZPM)-in bial 13 chuhin, independent candidate pakhat a awm bawk.