Health Minister Dr R Lalthangliana’n nimin khan Champhai Vengthara Urban Primary Health Centre (UPHC) leh Champhai District Hospital-a RTPCR Laboratory, Pediatric intensive care unit leh TRAUMA Centre te a hawng.
Dr R Lalthangliana chuan Mizorama urban PHC pakuana tur, Champhai UPHC hawn a ni chuan sorkarin mipuite hriselna a dah pawimawh hmasakzia a lantir niin a sawi a. UPHC hi education department hmun hmaah kalpui ni rih mah se, hmunhma nghet, building thar nena kalpui a nih theih nan hmalak mek a nih thu a sawi.
Health minister chuan Champhaiah Critical Care Block (CCB) din tum a nih thu pawh sawiin, kumin inthlan hma ngeia a lung pawh phum hman tum a nih thu a sawi a. “CCB hian khum pawh 50 a keng tel dawn,” a ti.
Nimina hawn tak Champhai Vengthara Urban Primary Health Centre (UPHC)-ah hian khum paruk awmin OPD, laboratory, immunization, NCD leh program hrang hrangte kalpui a ni a. Doctor pakhat, staff nurse pathum, health worker pahnih bakah thawktu dang mi 16, an vaiin thawktu mi 22 an awm a ni.
Champhai District Hospital-a bun thar hawn tak, RTPCR Laboratory siam hna hi October 10, 2022 khan thawk tanin kumin April 6 khan hna thawh zawh a ni a, room hrang hrang chei nan Rs. nuai 21 hman a ni.
PICU hawn thar tak pawh hi central sorkar fund, emergency Covid response package II atanga Rs. 14,40,000 senga siam a ni a. Trauma centre siam hna hi kum 2019 khan thawh tan a ni a, kumin April 3 khan thawh zawh a ni a, Rs. nuai 80.83 sen ral a ni.
Champhai UPHC leh thil dang hawnna inkhawmah hian Law Minister TJ.Lalnuntluanga leh Health & Family Welfare Board Vice Chairman, Dr.ZR.Thiamsanga te pawhin thu an sawi a ni.