Aizawl : New Delhi-a cham mek Health Minister Dr R Lalthangliana chuan Mizoram tan sorkar laipui hotu hrang hrangte dawrin Mizoram mamawh a thlen.
New Delhi-a ‘Asia Pacific Leader’s Conclave on Malaria Elimination’ a tel Dr R Lalthangliana hian Thawhtanni khan Land Ports Authority of India Chairman Mishra kawmin, Kawrpuichuah Integrated Check Post rang taka kalpui dan tur a sawi pui a. Hemi atana Home Ministry-a cheng vaibelchhe 552 a lo thlen tawh thin chu a thlen nawn leh a. Mishra chuan pawisa hi sanction nghal mek anih thu a lo hrilh.
Commerce & Industries minister hnenah Mishra hian Bangladesh Telemukh leh Kawrpuichuah, Mizoram lam inkalpawhna tur lei metre 660 a sei, cheng nuai 6400 senna tur pawh CPWD-in tender an chhuah tawh chu Bangladesh lam atanga kawng siam mek vuaicha lutuk chu chak deuh zawka thawk tura nawr turin a ngen bawk.
Dr.R. Lalthangliana hian border trade siam puitling tur India ram hmun hrang hrang 25 chauha hmalakna awm zingah Zokhawthar leh Zorinpui tihchangtlunna tur thlen lehin, DPR an siam nghal tur thu an lo hrilh a. Hei hi Prime Minister Office pawhin thla hmasa a thlir letna an neihah an ngaih pawimawh thu an sawi a ni.
Dr. R.Lalthangliana hian Union Secretary, border management enkawltu Gangawar pawh a pisaah kawmin, Mizorama border trade hmalakna hrang hrangte hi chak taka kalpui turin a ngen a. Hnahthial atanga km 6 vela hla Chhimtuipui lui, Tuipui D, Hnahthial atanga Sangau kawng lei dawh tur pawh a thlen nawn leh a ni.
Thawhtanni chawhnu vek khan Dr. R.Lalthangliana hian Bangladesh High Commissioner thar Md. Mustsfirzur hmu lehin, hmalakna kal mek Bangladesh leh Mizoram insumdawn tawnna tur pawh chak taka hmalak a tul thu a sawi pui a. Hemi hnu hian Dr. Ranjan Singh, Union Minister of State, i/c Education pawh a chenna inah hmuin Lunglei Southern Campus chungchang a sawi pui a. Maudarh quary chim avanga National Green Tribunal atanga harsatna mining lama an tawh thin chungchangah Senior Advocate Kartuala a sawi pui bawk.