World Health Organization chuan India siam khuh damdawi, Marshall Islands leh Micronesia-a thlengte chu a him tawk lo a ti leh ta.
Punjab-a QP Pharmachem Ltd-in an siam, Guaifenesin TG syrup hi WHO chuan a sample an endikah ‘diethylene glycol leh ethylene glycol a tam lutuk’ tiin a sawi.
Heng thil pahnih hi mihring tan a hlauhawm a, in/ei chuan thihna hial a thlen thei.
WHO thuchhuahah hian thihpui an awm tawh em tih tar lan a ni lo.
Thla rei vak lo liam taah khan WHO hian India-a siam khuh damdawi dang pawh Gambia leh Uzbekistan-a thihna thlentu nia sawiin inrinna thu a lo tichhuak tawh.
QP Pharmachem managing director Sudhir Pathak chuan an company chuan phalna an neih angin an damdawi siam hi Cambodia hnenah bottle 18,346 an thawn tih a sawi a. Marshall Islands leh Micronesia daih a thlen theih dan erawh a hre lo.
“Pacific region-ah kan thawn lo va, hmang thei tur pawh an ni lo. Engtin nge a thlen ve ngawt theih tih kan la hre lo,” a ti a. Company chuan Cambodia-a thawn chhuaktu firm chu dan anga thil awm dan an zawh mek thu a sawi.
WHO-in thuchhuah a siamah chuan awm na leh khuh damdawi atana hman hi Australia-a drug regulator, Therapeutic Goods Administration-in an endik niin a sawi.
Damdawi hi Haryana-a Trillium Pharma-in an hralh chhuah a ni a. Trillium hi biakpawh theih an la ni lo va, Indian sorkar pawhin engmah a la sawi lo.
Thuchhuahah chuan ‘a siamtu emaw, a hralhtu emaw pawhin WHO hnenah a him dan leh a that dan engmah thehluh an nei lo’ tia tar lan a ni.