Aizawl : Kumin kumtawp lama MLA inthlan lo awm tur atana PC party campaign pamphlet chu Thawhlehni khan PC President Vanlalruata’n tlangzarhin, campaign bul an tan.
PC party campaign pamphlet-ah hian kumin kumtawp lama MLA inthlan lo awm tura an party auhla tur tlangpui tarlan a ni a. PC party chu ram mamawha innghat policy nei a nih thu te, ram inawp leh inrelbawlna siamṭhat chungchang te, kawlphetha siamchhuah leh internet ṭha neih chungchang te leh human rights commission leh labour court din chungchang te pawh tarlan a ni.
Ram economy tun- gding tura khawl hman uar chungchangte pawh tarlan niin, a tlangzarhtu PC President Vanlalruata chuan “Mizoram hian tihsual kan nei a. kan ram economy chawichhuak turin agriculture leh a kaihhnawih lamah ṭanlain sorkar kan tilian zel a; tunah hian party dang te hmalak tumna chu hemi hawi tho hi a ni” a ti a. “He kalphung hian hma min tisâwn thei tak tak lo tih hmu reng chunga party dang te heti zâwnga an la kal zel hi a pawi ka ti” a ti.
Vanlalruata chuan an party economic policy chu a danglam bik nia sawiin, ram hmasawn tawh leh hmasawn chak te kalphung entawnna tur, industry leh entrepreneurship lama ṭanlakna tur a nih thu a sawi a. “Hei chiah hi kan ram damna tur chu a ni” tiin, an party policy ṭhat bik zia leh mipui tan PC chu Mizoram hmasawnna atana thlan tur niin a sawi.
PC party President chuan “PC party hi milian muthlu an sawi angin hun rei tak chu mihring nei ṭeuh siin che hleithei lovin kan awm” a ti a. Tunah chuan an lo tho chhuak leh ta nia sawiin, “Mizorama party office nalh, changkang leh nuam ber tur sak hna kan thawk ta mup mup a ni” a ti.
Hemi atan hian tha leh thawhlawm pawh a lut zel nia sawiin, MLA inthlan lo awm turah an party-in dinhmun pawimawh tak an chang chho dawn nia sawiin, tan la zual turin party mi te a fuih a. “Hetianga kan thawh chhoh mêk lai hian ram siamṭhat leh tihhmasawn duhtu tan kan hnenah hmun a awm a, lo kal ula, kan ram hi siamṭhain tihmasawn tak tak turin hma i la tlâng ang u,” a ti bawk.