Aizawl : Thawhlehni khan Lunglei West Block 1 Congress Committee chuan Leaders meet cum Political Training an nei a, Lunglei West bial Congress candidate PC Lalthanliana leh LDCC President KL Chhawnzauva te’n an hman pui.
LDCC Bhavan-ah hun hmanah thu sawiin PC Lalthanliana chuan LMC inthlan zawh takah tling zo lo mah se, an block chhunga party candidate te vote hmuh dan ngaihtuahin an la hmu tam hle tih a sawi a. MLA inthlan lo awm turah hian Lunglei district bial paruk awmah hian Thorang leh West Tuipui bial (Tlabung bial) hi an chan turah mipuite’n an dah a. Chutih laiin MNF te hian hemi bialah chuan tlin ngei ngeina tur sawi sa an nei ve lo tih a sawi a. Congress chuan tling tura beisei sa pahnihin bul an tan dawn niin a sawi.
Lunglei North bialtu MLA hlui PC Lalthanliana hian ZPM chu bial viltu tur mi 35 an puan hnuah vuivaite thlemtu tur committee an din chuan an dinhmun a tichiang hle tih a sawi a.. An sorkar hma hauha vuivai thlemtu tur din ngai hi an inzawrhna leh au hla ber ‘min chhin ve rawh u’ an tih chu enchhin tlak pawh an nih loh zia a tichiang hle niin a sawi.
Mi vantlang chin chung lam leh sorkar hnathawk ten chief minister atana tha ber tura an rin chu CM atana Congress in an hual Lalsawta a nih thu an sawi thin tih a sawi a. “Sorkar sum dinhmun siamthat kawnga rintlak leh mipui rin hlawh Pu Lalsawta hi Mizoram hian kan hmaa inthlan lo awm turah hian kan mamawh chu a ni,” a ti.
He hunah hian LDCC President KL Chhawnzauva pawhin thu a sawi bawk.