Maharashtra-in fur ruahtui tla nasa lutuk avanga district paruka tui lian a tawrh mekah mi 100 chuang chin hriat loh an la awm mek a, kar hmasa atanga lei min leh tui lian avanga thi hi 164 an tling tawh.
National Disaster Response Force (NDRF) chuan Pathianni zan atang khan Raigad-a Taliye leh Satara-a Ambeghar-a leiminna hmuna chhanchhuah hna a thawh chu tawpsanin chin hriat lohte hmuh an inbeisei tawh lo.
Chief Minister Uddhav Thackeray chuan Thawhtanni khan Satara district-a tui lenna hmunte tlawh tumin Pune atangin helicopter-in a thlawk chhuak a; mahse, khaw awm dan chiang lo avanga a tum theih loh avangin a kir leh.
State sorkar chuan Raigad district-a hmun thuma chhiatna thlengah chin hriat lohvin mi 53 an la awm mek tih a sawi a. Ratnagiri-ah mi 14, Thane-ah mi pali leh Kolhapur leh Sindhudurg-ah mi pakhat ve ve an la awm bawk.
Heng mite bakah hian tui lenna district dang pariatah mi 27 zet chin hriat a la ni lo bawk a. Thuneitute chuan heng mite hi tui lian chak takin a len bo tawh a nih an ring hlawm.
India khawthlang lam vaukamte hi kar kal ta Ningani atang khan fur ruahtui sur nasa takin a nuai a, India Meteorological Department chuan ruah a la sur zui dawn niin an sawi bawk.
State leh national highways tam tak, Mumbai-Goa highway pawh telin, Pathianni atang khan tui tling nasa lutuk avang leh hmun thenkhata tuiin kawng a lak bal avangin khar a ni.
NDRF leh sipaiten hna an thawh mekah district pariatah hian ruang hmuh belh zelin mi 164 thi an awm tih a chiang tawh.
Raigad-ah hian kar hmasaa hmun thuma leiminah mi 71 an thi a, Satara-ah mi 41, Ratnagiri-ah mi 21, Kolhapur-ah mi pasarih leh Thane-ah mi 12 an thi tawh.