Aizawl: Manpower Development Board Vice Chairman Zothantluanga, MLA-in nimin khan Aizawl Adventist Hospital-a oxygen generation plant a hawng.
Zothantluanga, MLA chuan sorkar puihna tel lova kohhran kaltlanga khawl thar Adventist Hospital-in a dawng thei chu a lawmpui thu a sawi a. Mi dangte tana malsawmna a nih ngei a beisei thu a sawi.
Aizawl Adventist Hospital-a OGP hi Adventist Development Relief Agency kaltlanga hospital-in a dawn niin Mizo Conference leh Mizorama adventist tual chhung kohhranten sum an pek khawm hmangin OGP tihnunna tur transformer leh a dahna tur in siam a ni.
OGP hi Rs nuai 24 man niin transformer bun nan Rs nuai 13 chuang sen a ni bawk.
OGP hawnna hunah hian Southern Asia Division of SDA hotute, Mizo Conference of SDA hruaitute leh tual chhung kohhran member bakah Aizawl West huam chhunga local council leh NGO hruaitute an tel a ni.