Bastar district, Chhattisgarh-ah improvised explosive device (IED) hmanga police chuanna minivan beihnaah police 10 leh an van khalhtu a thi tih thuneituten an sawi.
Police-te hi an thudawn bawhzuia Maoist laka beihpui thlaka an thawk chhuah haw lam niin Nilaini chawhnu dar 2:00 vel khan beih an ni.
Beih an tawhna hi state khawpui, Raipur atanga km 450 vela hla a ni a. TV-a thlalak tihchhuahah chuan IED puahna hnuhma chu feet 10 dawna thukin a khuar a. Lirthei pawh a chhe hneh hle bawk.
Police-te hi Chhattisgarh police hnuaia special force, District Reserve Guard (DRG) niin heng lai vela tribal mi, Maoist-te bei tura zirtirte an ni.
DRG hian left-wing extremism tamna, Bastar bawrah hian tun hma lamin helho lakah hlawhtlinna tam tak an lo chang tawh a ni.
Union Home Minister Amit Shah chuan Chhattisgarh Chief Minister Bhupesh Baghel be nghalin puih theihna awm zawng zawnga puih a inhuam thu a hrilh.
Prime Minister Narendra Modi pawhin, “Dantewada-a Chhattisgarh police beihna hi ka dem tak zet a. An nunna chânte zana ka hlan a. An inpekna hi hriat reng a ni tawh ang a, an chhungte pawh ka tawrhpui em em a ni,” a ti.
Baghel chuan, “Dantewada huam chhung, Aranpur police station huam china Maoist an awm tih hriaa anmahni beia thawk chhuak DRG sipai 10 leh an lirthei khalhtu an thi tih hriat hi a hrehawm tak zet a. An chhungte kan tawrhpui a, an thlarau muangin chawl rawh se,” a ti.
Tun tuma police beihna hi kum hnih chhunga thi an tam berna a ni a. April 2021 khan police 22 vel zet Maoist fighter-te hian Chhattisgarh-a Sukma district-ah an lo thah tawh.
A hma thla chiahin Narayanpur district-ah police 20 chuang phur bus chu Maoist helho hian beiin panga vel thatin eng emaw zat an hliam bawk.
Naxal tia hriat bawk, Maoist-ho hi kum 60 chuang zet chu sorkar lakah helin ralthuam an chelek tawh a, mi tam tak nunna an la tawh a. Anmahni chuan mi retheite tan, ram eibar dinhmun tha mek chhawr ve phak lote tan an che niin an insawi.
Kum 1967 daih tawh atang khan an pawl hi India rama himna dinhmun tiderthawngtu lian ber niin ram laili leh khawchhak lamah an tam a, an awmna lai hmun hi ‘red corridor’ tia sawi mai thin a ni a. Ramngaw chhah tak takah khawsaa chein Indian thuneitu leh sipaite an bei nasa a ni.