Mizorama sorkar hnathawk intelkawmna pawl lian ber, Federation of Mizoram Government Employees & Workers (FMGE&W) inkhawmpui chuan New Pension Scheme tiboin Mizoram sorkar hnathawk zawng zawng tan Old Pension Scheme hman an rel.
FMGE&W chuan nimin khan Vanapa Hall-ah general conference vawi 32-na neiin Chief minister Zoramthanga’n khuallian niin a hmanpui a. Sorkarna fawng vuantu thlan tlinte chu inthlak fo an nih avangin ram tan hmalakna tur hrang hrang tha tak tak ruahman thin ni mah se a hlawhtlinna tluantling chu sorkar hnathawk nghette chungah thui tak a innghat niin a sawi.
Chief minister chuan, “Mipui hamthatna tur ruahmannaa a rah tha lang tur chuan kum tam tak nghah ngaite a awm thin avangin chu rah duhawm chu a lan chhuah ngei theih nan sorkar hnathawkte an pawimawh a ni,” a ti a. Pawl anga hmalaknate pawh hmathlir thui tak nei chunga kalpui ni se tiin, ruahmanna a fel loh chuan vawiina miten tuar lo mah ila tu leh fate tan tuarna a thlen theih avangin fimkhur a pawimawh thu a sawi bawk.
Mizoram chu economy hmasawnna kawngah state entawntlak ni thei tura theihna (potential) tha tak a neihte chu hre reng chungin, sorkar hnathawkte pawh an ngaihtuahna chutiang zawk chuan siam danglama tlachawp a kal mai ni lovin, hmathlir thui tak leh tha tak neiin theihtawp chhuah turin a chah.
FMGE&W inkhawmpui hun khatna, chief minister hova hmanah a nih hnuah chawhnu lamah MJA kaihhruaiin hruaitu thar thlanna leh rorel inkhawm neih a ni a. Inhawmpuia rel tur agenda chhawpchhuak pakua zinga pakhat tih loh chu pawm vek a ni.
An thurel zingah dearness allowance hi central sorkar hnathawkte rate ang leh an lak rualin Mizoram sorkarin min pe ve thin rawh se; Mizoram sorkar hnuaia sorkar hnathawkten a hun taka hlawh kan lak theih nan FMGE&W in chak zawkin hma la rawh se; sorkar department hrang hranga post ruakte rualkhai takin hnawh khah ni rawh se; New Pension Scheme hi tibovin Mizoram sorkar hnathawk zawng zawng tan Old Pension Scheme hman ni rawh se; sorkar hnathawk Medical Reimbursement Bill hi tun aia awlsam zawk leh a theih anga kan senso ang phuhruk zawk turin sorkar nawr ni rawh se tihte leh IFMIS hi system lamah duhthusama hman theiha peih fel a nih hma chuan a hma anga hlawh lak chhunzawm ni rawh se tihte a tel a ni.