La Liga champion lai Real Madrid in tluk sual an nei leh a, tun season-ah an champion lallukhum an humhim dawn lo nia lang tawh chu a hlat belh leh a. Girona hmachhawnin 4-2 in an tlawm.
Municipal de Montilivi a inkhelah hian Real Madrid lakah Girona forward Valentin Castellanos chuan goal li a khung a. Kum 1947 December thla a Esteban Echavarria in Oviedo tana goal nga a khung hnua La Liga a Real Madrid laka goal li khung tling leh thei hmasa ber a ni.
Minute 12-naah Castellanos-a’n an goal hmahruai khungin Miguel Gutierrez ball cross chu vengtu nei lova awmin a tauh lut.
Minute 24-naah an goal hnihna a khung lehnghal a. A pawlte ball pet luh chu la in penalty area a luhpui a, Madrid goalkeeper Andriy Lunin goal-ah a khung.
Real Madrid hian first-choice goalkeeper Thibaut Courtois leh striker Karim Benzema te an chhawr theih loh zanah first half-ah Vinicius Junior hmangin goal khat an khung ve bawk.
Mahse second half-ah Castellanos bawk a che leh a, chawlhlawk zawh atanga second 36 chauh a kal hman tihin an goal thumna a hlap lut. Minute 62-naah a goal li na a tauh lut leh a. Real in minute 85-naah Lucas Vazquez hmangin goal khat an khung belh.
Real Madrid coach Carlo Ancelotti chuan, “Tlawm hi chuan a na thin a, tunah pawh hian a na viau. Kan defence a chhe hle a, kha kha inkhel tidanglamtu a ni. A chhan chu a bak zawngah khan kan khel chhe lo.” tiin inkhel zawhah a sawi.
Goal li khungtu kum 24 mi Castellanos hi Argentine forward niin tun season-ah loan in Girona in New York City FC atangin an hawh a. Anni pahnih hi Manchester City hnuaia club awmte an ni.
2021 MLS Golden Boot dawngtu niin MLS a goal 50 khung tling thei naupang ber dawttu a ni a. Tun season-ah La Liga bikah goal 11 a khung tawh a, inelna hrang hrangah goal 12 leh assist vawi khat a nei.