Formula 1 chuan kumin a sprint race a buatsaih dan tur a thlak danglam a. Tun kartawp a Azerbaijan Grand Prix-ah a hmang tan ang.
Sprint race hi F1 in kum 2021 atanga a kalpui tan kha a ni a. Intlansiak thlan bik thenkhatah Inrinni-ah intlansiak rei lo zawk kalpui a ni thin.
Kuminah sprint race hian hi grand prix pangngai nen a hrangin kalpui a ni dawn a. A hranpa in sprint race hian qualifying a nei dawn a. Hei hi ‘sprint shootout’ tia hming vuah a ni.
Pathianni a intlansiak a tlan chhuah dan indawt zawnna qualifying chu Zirtawpni-ah tlan a ni ang.
‘Sprint qualifying’ hi qualifying pangngai ang thova kalpui tur niin car ten hun erawh an nei tlem zawk dawn a. Session thum neih tur niin minute 12, minute 10 leh minute 8 te hun an nei ang.
Hei bakah hian qualifying pangngaiah team ten an tyre duh ang hmang thei mahse sprint race qualifying-ah chuan a hmasa pahnihah ‘medium’ compound an hmang anga, a hnuhnung berah ‘soft’ compound an hmang ve thung ang.
Tun Zirtawpni chawhnuah Free Practice leh qualifying hi tlan a ni anga. Inrinni-ah Sprint qualifying leh race tlan tur niin Pathianni-ah intlansiak pangngai tlan a ni ang.