Aizawl : Kolasib Bawrhsap John LT Sanga hova Covid-19 hrileng laka mipui himna tura inbuatsaihnate thlirin nimin khan a kaihhnawih mipawimawhte Kolasib-ah an thukhawm.
Chief Medical Officer, Kolasib Dr. Lalaw- mpuia Chhangte-in District Hospital, Primary health centre leh Community health centre-a ruahmanna awm te sawiin, tunhnaia Kolasib district-a Covid-19 kai mi 2 ten dam taka enkawlna hmun an chhuahsan leh tawh thu a sawi a. Covid-19 kai nia inringhlel tan engtiklai pawhin District hospital, CHC, PHC leh Health sub-centre-ah test theih a nih thu a sawi.
Kolasib district-a Health & family welfare hnuaia thawk te chu Covid-19 a darh leh palh pawha chetlak dan tur ataka tih chhin pui pui thin an nih thu CMO chuan a sawi a. Test kit, PPE, mask, damdawi hrang hrang leh thawktute dinhmun an thlithlai reng thu sawiin, Covid-19 mai ni lo, natna dang inkaichhawn theih laka him nan hospital, PHC, CHC leh puipunna hmunah hrim hrim hmaituam, kut silfai leh hand sanitizer hman uar zel pawimawh a tih thu a sawi.
Thutkhawm kaihhruaitu Kolasib Bawrhsap John LT Sanga’n India ram state hrang hrangte dinhmun thlirin Covid-19 kai an pun mek thu a sawi a. Mipui hriselna enkawl kawnga hmalatu ten hri laka him theihna tura ruahmanna tha tak an lo duan lawk avanga lawmawm a tih thu a sawi bakah District Medical Superintendent Dr. Sam- uel Lalfakawma Fanai-in khum 100 awm theihna District hospital thar sak meka hmalakna hrang hrangte a sawi bawk.
Khum 100 awm theihna tur Kolasib District Hospital chu NESIDS hnuaiah Rs. nuai 1859. 87 hmanga sak mek a ni a, thla 24 chhunga zawh hman tura tih niin, Hospital sak hna hi M/S VRC Constructions (I) Pvt Ltd, New Delhi-in an thawk niin sorkar thuchhuah chuan a tarlang a ni.