Inter Milan in Juventus lakah 1-0 in hnehna an chang hram a. Mahni mualah an mamawh result neiin Coppa Italia final an khel dawn.
Nilaini zanah San Siro-ah Juve nen hian inhmachhawnin first leg-ah 1-1 a inhnehtawk tawh an nih avangin chak thei ve ve an ni.
Inter tan hian Federico Dimarco chuan minute 15-naah goal awmchhun hi a khung a. Nicolo Barella ‘through ball’ pek duhthusam chu left wing-back Dimarco hian goal-ah a khung.
Inter Milan hian first leg inkhel boruak sang taka langsar Romelu Lukaku chu starting XI-ah an telh lova. Turin-ah hian Belgian striker hi a vunrawng avangin Juve tantuten an au el.
Minute 95-naah penalty atangin goal a khung hnuah amah tih eltute hmaah a goal khung a lawm a. Hei vang hian hnawhchhuah a ni.
Italian Football Federation chuan Lukaku hremna hi a hlip leh tawh.
Semi-final second leg-ah hian Juventus in beisei an pha lova, a bikin Inter tlarhnung in an khingpuite tlarhma chu an veng hneh hle.
Inter hian final-ah Fiorentina emaw Cremonese an tum leh ang. Fiorentina hian 2-0 in first leg-ah hma an hruai.
Inter manager Simone Inzaghi chuan, “Kan tan zan duhawm a ni a, team pahnihte a tawp thlengin an bei nasa hle. A tawpah erawh match hnih chhungin chak phu zawk kan ni.” tiin a sawi.