Prime Minister Narendra Modi chuan kartawp atang hian Karnataka assembly inthlan lo awm turah BJP tan campaign a tan dawn a, ni ruk lek chhungin hmun 22 velah hun hman hman a tum.
Modi-a hian Inrinni hian Bengaluru-ah roadshow lian tak huaihawtin bul a tan dawn a, state chhung hmun hrang hrang a tlawh zui ang.
Chawlhkar hnih chhungin ni ruk vel Karnataka-ah hian hun a hmang dawn a, BJP star campaigner lian ber hian a vawi khat tlawh apiangin rally vawi thum aia tam zel a nei dawn.
“BJP hian Karnataka inthlanah hian chet that an inbeisei tak zet a, heti chung hian Prime Minister Modi chu a thawk rip dawn hle,” tiin an party hruaitu pakhatin ANI a hrilh.
Inrinniah Humnabad, Vijayapura, Kudachi leh Bengaluru North-ah hun a hmang ang a. Pathianniah Kolar, Channapattna leh Belur-ah a ni ang.
Prime minister hian karlehah ni hnih hun a hmang leh dawn a. Thawhlehniah Chitradurga, Vijayanagara, Sindhanur leh Kalaburgi-ah vantlang inkhawm a ko vang a. A tukah Moodabidri, Karwar, leh Kittur-ah hun a hmang bawk ang.
Karleh Inrinniah Chittapur, Nanjangud, Tumakuru Rural leh Bengaluru South a tlawh ang a. Pathianniah Badami, Haveri, Shivamogga Rural leh Bengaluru Central-ah thu a sawi leh bawk ang.
Saffron party hian chhim lam state-ah hian ‘double engine’ tia an sawi, state leh sorkar laipuia a fawng vuantu nia hmasawnna thlentir chu an au hla a ni mek.
BJP hian Karnataka inthlanah hian Union Minister Dharmendra Pradhan chu election incharge atan an dah a. Union Minister Mansukh Mandaviya leh Tamil Nadu BJP chief Annamalai chu co-in charge an ni bawk.
Chief Minister Basvaraj Bommai chu campaign committee chairman niin election management committee chu Union Minister Shobha Karandlaje-a’n a ho thung.
March 29 khan Election Commission of India-in Karnataka inthlan tur hi a puang a. Bial 224 awmnaah hian May 10-ah vote thlakin May 13-ah chhiar a ni ang.