Aizawl District election office-in nimina AR Lammual-a ‘Vohbik Kutpui’ an buatsaih chu Social Welfare Minister Er. Lalrinawma’n a hmanpui.
Social welfare minister chuan Vohbik Kutpui chu ram rorelna leh khawtlangah dinhmun pawimawh tak chelhtu an nih thu vohbikte hnena hriattirna tur programme a nih thu a sawi a. Mizo kut hrang hrangte angin Vohbik Kut chu kum tina hman thin tura ruahman ni se a duh thu sawiin, “He programme hian mipuiin vohbikte kan thlir danah hmasawnna thar a thlen ngei ka beisei,” a ti.
Er. Lalrinawma chuan vote thlak pawimawhzia sawiin, “India hi inthlang ram kan ni a, khua leh tui kumtling tawhte chuan vote thlak kan chanvo a ni a, kan ngai pawimawh tur a ni,” a ti. Sorkar pawhin mi zawng zawng ram rorelnaa an tel ve chu a ngaihpawimawh thu leh chumi atana hma a lak reng thu a sawi bawk.
Chawhma lamah Lalnundika Addl. DC hovin Vanapa Hall atanga Sipai Lammual thleng kawng an zawh a. Hun hnihna Sipai Lammuala neih chu Aizawl Bawrhsap Dr. Lalhriatzuali Ralte, DEO-in kaihruaiin, Chhingpuii ‘State Award for the Welfare of Persons with Disabilities’ lo dawng tawhtu chu khualzahawm a ni.
Vohbik Kutpuiah hian Ephatha Special School, Shining Star School, Gilead Special School, Special Blind School, Redeem Garden leh Rephedim Home-te atangin zai leh lam, recitation leh item hrang hrang thlirho niin, chawhnuah intihhlimna hun buatsaih a ni bawk.