Mizoram Larsap Dr Hari Babu Kambhampati chuan police hnathawh tanpuina ngaihtuah chhuak tura computer thiam intihsiakna Hackathon chu nimin khan a hawng.
Mizoram Police Headquaters Arya Mess-a hawnna inkhawmah larsap chuan police-ten hlawhtlinna lian sual chhuaka dan leh thuphek kenkawh kawngah, ruihlo do kawngah te, hnu chhui kawngah te, pawikhawihna chhuihchhuah kawngah te, Aizawl leh khawpui danga lirthei veivak mumal taka kaihhruai kawngah leh thil dangah te hna ropui tak an thawk chu a chhuan thu a sawi.
Larsap chuan NIT leh Mizoram Police ten computer thiam rual, zirlai hmabak eng tak nei te tana ram venhimna kawnga thluak thawh tura chona an chhawp chhuak chu ngaihtuahna fing taka atanga hmalakna a ni a, he intihsiakna hian rah tha tak a chhuah a rin thu a sawi a. Computer thiam bik, zirlai rual te chu ram tana an theihna sang ber chhuah tura fuihin duhsakna a hlan.
Nimin atanga Inrinni thleng awh tur Hackathon (Hackadventute) hi Mizoram Police leh National Institute of Technology, Mizoram (NIT) tangkawpin an buatsaih a ni a. He hunah hian zirlaite chuan dan leh thupek kengkawhtuten an ni tin hnathawhah eng harsatna nge an hmachhawn thin tih te leh cyber crime chungchang te an zir ang a. Heng an thil hmuhte behchhan hian dan leh thupek kengkawhtute mamawh leh hman tangkai tur technology duan chhuah an tum dawn a ni.
He intihsiakna neih chhung hian Narcotics Control Bureau (NCB), Indian Cybercrime Coordination Centre (14C), National Crime Records Bureau (NCRB) leh Cyber Security lama mithiamte te hnen atangin an hriattur te kawhhmuh an ni dawn bawk.