Prime Minister Narendra Modi-a’n radio kaltlanga ram pum huapa thu pawimawh hrang hrang a sawi thinna programme, Mann ki Baat episode 100-na chu Pathianni hian AIR atanga tihchhuah a ni dawn.
He hun urlawk nan tun kar chhungin New Delhi-ah hman mek a ni a. Hemi puala buatsaih National Conclave on Mann ki Baat@100 chu Ningani khan Vigyan Bhawan-ah Vice President Jagdeep Dhankhar-an a hawng a, I&B leh Sports Minister Anurag Singh Thakur leh I&B Minister of State Dr. L. Murugan ten an tawiawm.
Conclave kharna inkhawmah Home Minister Amit Shah chu khuallian a ni a, Railway Minister Ashwini Vaishnaw te, I&B Minister Anurag Thakur leh Finance Minister of State Pankaj Chaudhary ten khuallian hi an tawiawm.
Conclave-ah hian thusawitu zingah filmstar Aamir Khan te, IPS officer hlui Kiran Bedi te, Jamia Millia Islamia University VC Prof. Najma Akhtar te, filmstar Raveena Tandon te an tel a. An zingah hian Mizoram atangin Save Chite Lui Coordination Committee General Secretary Rochamliana pawh a tel a ni.
Pathianni hian India ram puma state tin Raj Bhavan leh UT-a Raj Niwas zawng zawngah Mann ki Baat episode 100-na pual hian hun hmang vek tura ruahman a ni bawk.