Assam-a BJP party-a hmeichhe pawl, Mahila Morcha chuan police hnenah Congress state Working President Rana Goswami-a’n mawi lo takin hmeichhe chungchang a sawi nia puhin complaint an thehlut.
Goswami-a hian thuthar lakhawmtute a kawmnaah BJP sorkar hnuaiah hmeichhiate an him lo tih a sawinaah a sawi tel nia puh a ni.
BJP thupuangtu, Janki Khound-i hmingin Dispur Police Station-ah complaint hi thlen niin Goswami-a hian BJP hmeichhe worker-te chu mipa nen mawi lo taka inkungkaihna nei niin a sawi niin an tar lang.
“April 24 khan Rana Goswami, Assam Pradesh Congress Committee Working President hian Sivsagar-ah thuthar lakhawmtute kawmin BJP hmeichhe worker-te chungchang mawi lo takin, hmingchhe tak leh zahawm lo takin a sawi a, ‘BJP hmeichhe worker-te chu kawppui nei reng chungin mipa dang nen an khawsa’ tia a sawi bakah hmeichhiate hminghliauna tur ang chi tawngkam tam tak a hmang,” tiin lehkha thehluhah tar lan a ni.
“Heta a dik lo taka thu a sawite hi chanchinbu leh media hrang hrangah zau taka thehdarh a ni a. Hmeichhe worker-te tihbawrhbanna leh an chhungkaw nun thlenga tibuai thei a ni a, kan kawtlang nuna an hmel tichhe thei thil a ni bawk,” tiin BJP hruaitu, Juri Sharma Bordoloi-i’n a sawi.
Bordoloi-i chuan hetianga hmeichhe chungchang sawitu Congress hruaitu hi an party chuan man ngei an phut tih a sawi bawk.
“Rana Goswami-a thil sawi hi kan duh lo tak zet a, BJP hmeichhe worker-te a sawi dan avang hian man ngei kan phut a. Congress sorkar lai khan hmeichhiate hi an hniam em em a, tun hnai maiah pawh Congress hruaitu lawkten Assam-a hmeichhiate an tih dan kan hria a ni,” a ti.
Goswami-a emaw, Assam Congress emaw chuan rorel lai party hmeichhe pawl chet zui danah hian sawi an la nei lo.