Aizawl : Thawhlehni khan Aizawl North II bialtu MLA Dr.Vanlalthlana’n a bial chhunga Kids Care School kum 25-na lawmna Vanapa Hall-ah a hmanpui.
Kids Care School-in kum 25-na lawmnaa khuallian tura an sawm chu lawmawm a tih thu sawiin Dr Vanlalthlana hian, “Hlawhtlinna hi sumah teh lovin midangte tana kan luanchhuahnaah kan teh tur a ni. Intodelhna hi lehkha kan zir taimak leh taimak lohah a innghat dawn a, kan eizawnna tur kawngah hian kan tuina a pawimawh a, mahni hi kan pawimawh ber,” a ti.
Zirtirtute pawhin zirlaite an fuihnaah hian hna zawng tur ni lo va, mahni tawka intodelh thei tura an fuih a ngai tawh tak zet niin a sawi bawk.
Kum 1998 khan Kids Care School hi Ramhlun South-ah din a ni. Kumin hian zirlai 351 leh zirtirtu 15 an awm mek a ni.