Premier League champion nih tum a intlansiakte intawn hun a thleng a. Hmahruaitu Arsenal in Manchester City hmachhawnin champion lai in kawng engkimah an thunun a, 4-1 in an lo hneh.
Nilaini zanah Etihad Stadium-ah khawvel football nghahhlelh inkhel hi khelh niin tam takin he inkhel hian tun season a Premier League champion tur a hril dawn niin an ngai.
Hnehna an chan avangin Pep Guardiola pawlte hian khelh hnih a khel tlem zawk chungin point hnih chauhin Arsenal hi an pha lo tawh. Point thum an hmu satliah a ni lo, rilru a inbeihnaah a kutthlak na zawkah City an tang.
Goal luh nan minute sarih bak a ngai lo. Striker Erling Haaland chuan amah chawm thintu Kevin de Bruyne tan siamsakin Belgian midfielder in goal a khung.
City in Arsenal goal an nawr fova, dan an ni hram thin. First half tawp dawnah John Stones chuan City goal hnihna a tauh lut. Offside tih zet a nih hnuah VAR hmanga endik niin a offside lo.
Second half minute 54-naah Haaland bawkin De Bruyne goal khung tur a siamsak leh a. Gunners defender Rob Holding kap karah pet lutin goal a khung.
Holding-a’n Arsenal tan goal khat khung ve mahse Haaland-a’n huntha a neih tum nganaah tun season a a goal 49-na a khung.
Hnehna an chan avangin City hian Pathianni zana Fulham an hneh chuan Arsenal lehpelin league-ah hma an hruai ang.
Manchester City manager Pep Guardiola chuan inkhel zawhah, “Tunah chuan kan tan inthlahdah a thiang tawh lo. Kan kuta awm a ni tawh a, hlawhtling lo thei hi kan ni tawh lo.”
“Kan hmabak a khelh leh tur pathumte hian kan dinhmun dik tak tur a hril ang. Tunah chuan Arsenal hi kan chungah an la awm miau a, keini lamin tih tur kan la nei. A awlsam dawn lova, match khat zelin kan thlir phawt ang.” tiin league champion nih tuma an kaldan tur a sawi.