Aizawl : Mizoram Pradesh Congress Committee (MPCC) President Lalsawta chuan ram hruaina phur thut thil a nih loh avangin ram rorelnaa tel tur te chu mi langsar leh lar, mi hausa khawnkhawmna tur a ni lo tih a sawi.
Tuirial bial chhunga Lungdai leh Kawnpui, Kolasib leh Serlui biala Kolasib leh Bilkhawthlir-a Congress party hruaitute nimina a tlawhnaah MPCC President hian Mizoram inthlanah kumin 2023 hi a danglam bik tih a sawi a. “Kil thum atangin kan inbei mek a. Keini chuan hausak tum leh hausak avanga MLA nih tum hi neih belh tumna mai a ni,” a ti.
Ram hruaina hi phur thut thil a nih loh thu sawiin Lalsawta hian, “Ram rorelnaa tel tur te chu mi langsar leh lar, mi hausa khawnkhawmna leh hnawh khawmna tur a ni lo,” a ti bawk.
Congress President hian kum 13 chhung sorkar hna a thawh hnuah mipui rawngbawlna zau zawk neih tumin politics a zawm tih a sawiin, “Politician in hmuh ang hi ka ni ve lo. Chief Minister nih ka tum ngai lo. MPCC President nih ka tum ngai lo,” a ti a. Kum 2018 hnuah politics atanga chawlh hahdam a tum a, mahse, ramin a koh avangin Mizoram tana sorkar tha pe turin a let leh chauh niin a sawi.
“Hausak leh zual ka tan a tul lo. Tuna ka dinhmun aia nawmsak zawk hi ka thlahlel ve lem lo. Dinhmun tha chan duh vanga lem ang der a. Chakma vote tel loa sorkar tuma insawia parthi awrh tir leh vel mai mai chi ka ni ve lo,” tia sawiin Lalsawta hian tum a nei a, Mizoram a hruaina tur kawng a hria a, Mizoram tan pawh a tha a. Pathian pawhin mal a sawm a rin thu leh Pathian hian thil tha duh, rilru dik pute chu a hruaiin mal a sawm thin niin a sawi.
Congress party-in sorkar tha Mizoram mipui a pek theih nan sut tlang ngai chu ‘political will’ hmangin a su tlang dawn tih sawiin, “Chu chu Pathian hnena ka inhlan dan a ni. Mizoram hmakhua atan rorelna tha, Good Governance pek hi ka bat a ni a, chu chu ka tum a ni a, ka duh ber a ni bawk,” Lalsawta hian a ti bawk.