Congress treasurer a nihna atanga bânna theh lut, Zodintluanga Ralte, MLA chuan ZPM a zawm ngai dawn loh thu a sawi.
Ningani khan Thorang bialtu MLA Zodintluanga Ralte hian a bial chhunga Lungsen North Branch YMA Hall a hawng. Thusawiin, “Congress party treasurer atanga ka bân avangin Congress party ka chhuahsan lo a. ZPM leh party dang ka zawm dawn loh bakah ZPM ka zawm ngai dawn lo,” a ti.
Congress Legislature Party Leader Zodintluanga Ralte hian tun hnaia social media-a an thlalak darh kha Lungsen ngeia hun rei tawh tak liam taa an lak a nih thu a sawi a. “Lunglei tlangval pakhatin ‘Congress-ah lawm lut tiin ka post dawn’ ti fiamthua min lakpui a ni e,” a ti.
Zodintluanga Ralte hian Thorang bialtu MLA a nih atang hian Mizoram hmun hrang hrangah hmasawnna hmuh tur a awm nual bakah Lungsen-ah hmasawnna tam tak a lo awm ta chu lawmawm a tih thu a sawi a. Zirna lama an rualawhnate phuhruk a nih thu te, Matric Exam Centre leh Higher Secondary School-te a awm tawh thu te, tui harsatna sukiang tura tanky dah belh ngaite an han dah belh thei te leh tui harsatna sukiangin tui thianghlim in tur hnianghnar neih a ni ta chu lawmawm a tih thu a sawi a. A bial chhung khaw kil khawr ber berte pawh lirthei kawngin a pawh ta vek maite hi hmasawnna nasa tak a nih thu a sawi bawk.
YMA Hall hawnna hi Lungsen North Branch YMA President P. Biakchungnunga’n a kaihruai a ni.