MNF thalai President, Lengteng bialtu MLA ni bawk, Dr L. Thangmawia’n ZPM party-in Mizo nationalism chawisan lam an hawia a lan loh thu sawiin, “Mi tlin lohna zawnkhawm leh issue base-a politics thiam taka kalpui bak an hnen atang hian danglamna kan la hmu rih lo,” a ti.
Chiahpui Community Hall-a Lengteng North block MNF-in political training an buatsaih a hmanpuinaah he thu hi nimin khan L Thangmawia chuan a sawi a. “ZPM-in kalphung thar an zawrh hi tuna an kal mek dan a nih phei chuan principle nei lo, nikum lawka an duh loh kha kuminah phur taka kalpui leh thei mai zel, lalna leh thuneihna chan ngawr ngawr ngaihtuaha Mizo mipuite vehthlem mektu an ni,” tiin, an hlimthla chu mi thil chik mite tan chuan chiang takin a lang tawh niin a sawi.
ZPM-a tel zinga member ngah ber, ZNP chu tun hnaiah thiam taka suih tetin an awm mek nia sawiin L Thangmawia chuan, kum 20 chuang ZNP-a lo awm tawhte leh Mizo thalai hnam vei zawng zawngte MNF-a lut zel turin a sawm.
Lengteng bialtu MLA chuan kum li chhung Lengteng bialtu MLA a nih tawh chhungin mipui tana tih tur tih loh tam tak leh tih loh tur tih zawk pawh tam tak a neih a rin thu sawiin, Lengteng bial mipui ngaihdam a dil a. MNF-in beihna nasa tak an tawk mek nia sawiin, “Hei hi kan inenfiahna tura Pathianin rem min ruatsak a ni tih i pawm ang u,” tiin, “Kan tih dik lohah thupha chawia kan ram leh hnam tana tha zawka kan thawh theihna tura kan rilru tuaithar nan hmang zawk i la, term leh pawh awlsam takin Pu Zoramthanga kaihhruaina hnuaiah sorkarna kan siam leh ngei ang,” a ti.