Mi Naran Pawl – Aam Aadmi Party Mizoramin nimin khan Aizawl Press Club-ah thuthar thehdarhtute an kawm a. Hmarchhak bialtu Rajesh Sharma chuan Mizorama sorkar hnathawkte tan old penbsion scheme tihhlawhtlin ngei an tum tur thu a sawi.
Rajesh Sharma chuan mipui tana hnathawk tura ding an nih thu sawiin, state nih tirh atanga thawh daih tawh tur, la thawh si loh hna pawimawh tak tak an ngaipawimawh dawn niin a sawi a. “Zirna lam leh hriselna lama nasa taka hmasawn turin hma kan la ang a. Eirukna laka fihlim sorkar nei turin hma kan la dawn,” a ti.
AAP hmarchhak bialtu chuan Mizorama sorkar hnathawk ten old pension scheme an duh vek nia an hriat thu sawiin, “New pension scheme hi paihthlaka, old pension scheme an hman leh kan duhpui, Punjab-ah pawh AAP sorkarin hei hi a tihlawhtling tawh a, Mizoramah pawh old pension scheme hi tihhlawhtlin ngei kan tum,” a ti bawk.
AAP hmunpui, Delhi-a an hotute hnen atanga kumina Mizorama MLA inthlanpuia chuh tura remtihna an dawn tawh thu sawiin, “MLA inthlan lo awm turah kan ding dawn a, a tam thei ang ber candidate neih kan tum. Chutihlaiin, eiru leh tan in-a tanna khawp sual ti tawh te tan kan party-ah hmun a awm lo,” a ti a. Tun dinhmunah hminghmerha sawi fak theih candidate 20 an neih tlin tawh thu Rajesh Sharma chuan a sawi.
Thuthar thehdarhtute hnena an sawi danin AAP Mizoram hian Aizawl Municipal Corporation (AMC) huam chhungah block pali – South I, II leh III bakah West III-ah an din tawh a. Chawlhkar thar lo awm tur atangin Aizawl North-ah block din tura hma an lak tur thu an sawi bawk.