USA-a a zinnaa amah kawmtute hmaa BJP zawm tum awm anga ngaih theih tura thu a sawi chu a fiamthu thawh a nih thu Speaker Lalrinliana Sailo-in a sawi a. MNF party chhuahsan tumna a thinlungah a awm loh thu a sawi.
Assembly Speaker Lalrinliana Sailo hi April thla tir lam khan USA-ah a zin a, nimin khan Mizoramah a lo haw.
Lengpui Airport-a thuthar thehdarhtuten an kawmnaah USA-a a cham laia Mizo unaute nen an inkawmnaa a thu sawite a sawifiah.
Lalrinliana Sailo chuan, “USA-a awm Mizo unaute nen kan inkawmnaah thu pahnih fiamthu ka thawh a, pakhat chu ka haw hunah chief minister hi sawipui ila, ‘BJP ka zawm mai dawn emaw ni le?’ tih a ni,” a ti a. BJP chu an that thute, ram leh hnam tan zawm duh an awm teuh a rin thu a sawi.
BJP zawm tum awm anga a thu sawi chu sawi chhunzawmin, “Chief minister-te nen kan sawi ho ang a, tha an tihte a nih chuan nakuma MP inthlan dawnah an inhawn laiin hemi chungchang hi chu kan la sawi ang chu,” a ti.
MNF chhuahsan tumna a neih leh neih loh chungchang zawhna pawh chhangin, “MNF chhuahsan tumna hi ka thinlungah a awm lo,” tiin a sawi.
An party president, Chief Minister Zoramthanga chu eptu party-ten an bei nasa a, an sawichhiatsak nasa hle tih a sawi a, “Kan CM hi kan party-in kan chhan hneh tawk lo hlein ka hria,” a ti.
Lalrinliana Sailo chuan chief minister in Minister of State Robert Romawia Royte a duhsak bik anga puhna awm chungchang chu chanchinbumiten zawt lo mah se a sawi tel a, “Mi thenkhatin chief minister hi Pu Robert Romawia Royte duhsak bika a tana central atanga pawisa pawh chhuahsakah leh chu chu insem kualah an puh a, hei hi a tak a nih ka ring lo,” tiin a sawi.
Speaker chuan eiru thin hotu an neih chuan zui reng thu a awm loh thu a sawi a, hetihrual hian chief minister chu dik taka hnathawk leh Pathian mi nia a hmuh thu a sawi bawk.
Lalrinliana Sailo thusawi lai video social media lamah darhah hian tuna sorkar kal danah a lungawi lo thu te, tun sorkar kal mek chhunga zirtirtu lakah political appointee a tam thute a sawi a. Chanchinbumiten an kawmnaah hian a thu sawiah sawi sual a neih a hriat loh thu a sawi a, “Ram tana tha nia ka hriatte ka sawi,” tiin a sawi bawk a ni.