Taxation department-in nimin khan kum 2022-2023 chhunga sorkarin an sum lakluh tura a ruahman, target an khum an lawm a, Chief Minister Zoramthanga’n a hmanpui. Taxation hian an target chu Rs. vaibelchhe 120.62-in an khum a ni.
Chief Minister Zoramthanga chuan taxation department-in sum an hmuh tur zata ruahman an hmuh kim mai bakah nasa taka an khum chu thawktute thahnemngaihna a nih thu te, sorkar leh state tan thil lawmawm tak a nih thu te a sawi a. Mi dangte tan entawntlak an nih thu sawiin, hmasawn zel turin a chah.
Zoramthanga chuan hmasawnna hnathawhna tur atan sorkar laipuiin development fund tam tak a kawl, project hmanga haichhuah tur a neih chu a pawimawh thu a sawi a. Chung fund sanction chu state in a lo dolet vena tur chu state sum a awm a, a zuk thalchhuah lamah tan lak a pawimawh thu a sawi bakah chhiah atanga sum lakluh kawngah pawh hmalak zel a pawimawh thu a sawi bawk.
Taxation Minister Lalchamliana pawhin a department enkawl hlawhtlinna chu lawmawm a tih thu a sawi rualin contractor zingah GST pe lo leh GST-a inziak lut lo la awmte chu tan lak ngaihna lai a nih thu a sawi a. Sorkarin department tan Addl. Commissioner leh Dy. Commissioner post pakhat ve ve a pek avanga lawmthu sawiin, district thara office nei tura hmalak mek a nih zel thu a sawi bawk.
Kum 2022-2023 chhunga taxation department-in chhiah a hmuh tura beisei chu Rs. vaibelchhe 900 a ni a, chhiah a hmuh zawng zawng hi Rs. vaibelchhe 1,020.66 a ni a, chhiah an hmuh tura beisei an khumna chu Rs. vaibelchhe 120.62 a ni.
Inkhawm hi Commissioner of State Tax R. Zosiamliana’n a kaihruai a, Taxation Principal Secretary Vanlal Chhuanga’n thu a sawi bakah Joint Commissioner of State Tax David Lalchhuanawma’n revenue collection chungchang report a pe a ni.