Tottenham Hotspur in second half-ah goal hnih an khung a. Halftime-ah anmahni fans ten an ‘boo’ hluah hluah hnuah second half-ah insiamtha in ‘comeback’ tha an puitlin a. Manchester United nen 2-2 in an inhnehtawk.
Tottenham Hotspur Stadium-ah Spurs hian tunhnaia an buaina kalsan a insiamthat bul tanna kalpui an tum. Interim manager Cristian Stellini an ban hnuah Ryan Mason hi interim manager thar atan an lalut a, a hnuaiah a vawikhatna atan an inkhel.
Beisei ang erawh an ni lo hle a. United in awlsam takin hnehna an chang mai dawn niin first half-ah a lang hman.
English winger Jadon Sancho chuan minute 7-naah goal hmasa zawk a khung a. United hian Spurs tlarhnung hi vawi engemaw zat tibuai in Sancho hian goal khung belh theihna hun a nei nual.
Red Devils in ball an chang tam zawk a ni mai lova, an duh ang thala inpek kualna hun neiin Spurs player-ten an tibuai tam lo.
Halftime dawnah Marcus Rashford chuan tun season a a goal 29-na a khung a, United dinhmun a tha.
Second half erawh thawnthu dang ang mai a ni thung. Halftime chawlh Spurs in an hmang tangkai. An player-te an tlan taima sawt a, ball inchuh leh huaisenna kawngah a hma aiin an inpekna a sang zawk.
A rah an seng har lo. Minute 56-naah United in an penalty area atanga ball la chhuak mai lovin Pedro Porro chuan mawi takin a volley lut.
Bruno Fernandes hmangin United in goal bar tih per zui mahse Spurs zawk chu team hlauhawm an ni chhunzawm a. Son Heung-min-a’n minute 79-naah an si phurh sutna goal a khung zui ta a ni.
Goal khungtu Son chuan, “Kar hmasa a kan result kha pawm dam a har. Kha khan min la nghawng a, 2-0 a kan hniam zawk khan min ti thinur hlawm a, chu chu second half a kan rawn chet that theih chhan kha a ni.” tiin a sawi.
United manager Erik ten Hag chuan, “Halftime hma leh hnu kha a danglam hle. Ball kan hloh hnem a, inkhel kan thunun miau loh chuan inbeihna hautak zawk a thleng lo thei lo.” a ti ve bawk.