Aizawl : BJP Mizoram State Vice President Vanramchhuanga chuan Mizorama hmasawnna thlen loh chhan hi sorkarna chelh tute mai bakah kohhran hruaitu thenkhatte sakhuana behchhana politics chungchang an sawi thin vangah a puh.
Nimin khan BJP Mizoram chuan an pisa Mipui Run-ah Friday Political session an nei a. He hunah thu sawiin Vanramchhuanga chuan, tun hnaia hmar chhak state hmun thenkhatah court thutluknaa sakhaw biak in thiahsakte chungchang sawiin, “Sorkar rama biak in sa an nih vang leh thiat tura court in thu a pek hnu pawha hun rei tawh tak chhung an thiah duh loh vanga sorkarin court thu anga thiat an ni,” a ti.
Mizoramah erawh biak in thiah sakte hi BJP beih nana hmang thin party an awm chu pawi a tih thu sawiin Vanramchhuanga hian, “Thudik hre hmasa lo va, tu te party emaw propaganda hmanga video darh thin kan lo awi mai zel te hi a pawi hle. Intellectual chin te pawh hian thil diklo chu kan do ngam a hun tawh a ni. Chuvangin, Mizorama hmasawnna thlen loh chhan hi sorkarna chelhtu te mai bakah kohhran hruaitu thenkhat ten sakhuana behchhana politics chungchang an sawi thin avang leh, sorkar officer te hian an mawhphurhna an hlen tawk loh vang a ni,” a ti a. He’ng zawng zawng hi mahni mawhphurhnaah ngai ngam ngat se chuan ram siam thatna politics dik hi a lo thleng ngei dawn niin a sawi.
Vanramchhuanga hian mipui sorkar hi a taka hmangtute chu BJP sorkarna state-ah zel a nih avangin, Mizoramah pawh mipui sorkar, hmasawnna dik thlen thei leh eirukna do tlat tu party BJP hi a sorkar a tul niin a sawi bawk.