ZPM party VC dinna Sumsuih VC chu chawlh lailawk (suspend) tir a ni a, Sumsuih VC chawlhtir lailawkna thupeka a lan danin Sumsuih VC chawlhtir lailawkna chu April ni 19, 2023-ah Local administration department (LAD) atanga tihchhuah angin lang mahse, April ni 27, 2023 zingah Sumsuih VC chawlh lailawk tir a nih thu chu an hre chauh niin Sumsuih VC hruaitute chuan an sawi.
Sumsuih VC chawlh lailawk tir a nih chungchangah hian Aizawl South III block II ZPM party-in thuchhuah siamin, Sumsuih VC chu Sumsuih unit MNF-in thu diklo hmanga an hek vang niin an tarlang a. Sumsuih VC te hekna chu VC thiahna tham nia ngaih a nih loh hnu, inremna pawh July ni 15, 2022 siam a nih hnuah Sumsuih VC hektute chu LAD Minister hnenah kal lehin tun dinhmun hi an thleng ta niin an tarlang bawk.
Sumsuih MNF unit-in Sumsuih VC an hekna – safety reserve chhunga Bawngvulh mi 5 hnena ram pe-a puhna chu thu diklo a nih thu Aizawl South III block II ZPM chuan an sawi a. “Gram Sabha kalkhawm remtihnain ran chaw hmun tura VC hmasa (MNF VC)-in Bawng in hmun atana ram a pek bul chu Bawng vulhtute hnenah Bawng an vulh chhung atana hman hawhtir an ni” an ti.
Supply reserve humhalh chungchangah anmahni thu chhuah bawhchhiaa thing zaitira puhna pawh “thu diklo a ni” tiin, Mimalin ceiling atana an zai sa chu VEC-in MGNREGA hnathawhna atan an phal lo chung an leisak zawk niin an sawi a. VEC member-ah MNF unit atang pawhin mi pathum an tel thu leh an unit OB ṭanglai pawh a tel thu an sawi.
Sorkarin lo hal hun a ruat pelh hnua lo hal leh mi ram tihkan chungchanga Sumsuih VC te action la lova puhna pawh thu diklo a nih thu Aizawl South III block II ZPM chuan sawiin, “Sumsuih VC-in mahni ram vat te chu February thla chhunga hal tura a tih zawm lova mahni ram vata February thla chhunga hal hman lo chu sorkarin lo hal hun tur a ruat March ni 15 hmain hal hman tho mahse, VC ten lei an chawi tir zawk” an ti.
Safety reserve chhung vawnghim zo lova puhna leh hmun hrang hranga mimal thingzaina a awm nia sawia Sumsuih MNF unit-in Sumsuih VC an hekna pawh thu dik tawklo a nih thu Aizawl South III block II ZPM chuan an sawi a. UPC Biak In bulah mimalin thing an zai nia an sawi chungchangah “thing ro lo zaitu hnenah lei chawitir a ni” an ti.
Pu Venga Bung bulah thingzaina a awm nia sawi pawh helai hi mimal thingpui huan a nih thu leh safety reserve huamchhung a nih loh thu Aizawl South III block II ZPM chuan an sawi a. Vengthar mawnga thingzaina nia an sawi pawh helai hmunah hian thing zaina a awm loh thu sawiin, Vengthar thlanmual bula thing zaina a awm nia sawi pawh Sumsuih khuain vengthar thlanmual an neih loh thu an sawi bawk.
Aizawl South III block II ZPM chuan MNF party chu thuneihna hmangsual luia, diklo taka Sumsuih VC laka thil ti ah an puh a. Hriatthiam har an tih thu leh an dem thu sawiin, tunhnuah hetiang thil hi thleng tawh lo se an duh thu an sawi bawk a ni.