India leh Pakistan inrina, Line of Control (LoC)-ah chuan Ningania ram pahnihten inkahhai thar khauh zawk puanga silai hmeh puah an tum tawh loh hnuah thawm a reh hle.
India-Pakistan inkahhai puan thar hi lehlam lehlamah thlawp a hlawhin ram dangte pawhin tha an ti hle a. Hetih lai hian LoC bula cheng, Dar hnam chuan an la ringngam tak tak chuang lo.
An tan chuan silai puak leh mortar avanga hliam tuar awm hriat hi thil thar a ni lem lo va, Balkote khuaa chengte chu hlauhnain rei tak a lo tuam tawh.
November 13 pawh khan Uri sector-a inkahhai bawhchhiatnaah Bashir Ahmad Dar-a in chu mortar-in fuhin a nupui, kum 38 mi, Farooqa Begum leh an fate panga an thi vek a, an zingah hian a fanu thla 15 mi lek, Aliza pawh a tel.
“Thing fawm tura in kan chhuahsan dawn lai takin kan in chu kah fuh a ni a, a puak a, a thi nghal,” tiin Dar chuan a sawi.
Kum tam tak chhung silai leh inkahna thawm hre reng renga lo awm tawh a nih avangin tuna inkahhai puan thar pawh hi a la ring ngam lo.
“India leh Pakistan hian inkahhai an lo puang pawh a ni thei a; mahse, keini chuan inkahna a tawp tak tak hi kan ring thei lo, ka thu sawi hi lo chhinchhiah reng rawh u, LoC-ah hian inkahna a thleng leh em em ang,” a ti.